ستاند لحفظ وترتيب المناكير

   بسم الله الرحمن الرحيم 

السلام عليكم ورحمه الله وبركاته

كيفكم ان شاء الله تمام 

.
.
.

دي أول تدوينه ليا وحبيت أفتتحها بموضوع

" كيف تسوي ستاند لحفظ وترتيب المناكير "

أحب أرتب مناكيراتي المفضله في ستاند عشان تكون واضحه قدامي وكل مااشوفها أتحمس واسوي مناكير بعكس لوكانت في مكان مغلق زي الأدراج

 صح ممكن تكون تطفش من ناحيه التنضيف عشان مكشوفه ويجي عليها الغبار بس صراحه انا مايهمني دا الشي لاني استمتع في تنضيفها 

.

.

.

.

.

.

نجي دحين للطريقه 

أول شي الأدوات الا تحتاجيها

ملاحظات مهمه قبل البدء

الأستاند الا حأسويه حيكون من 6 مدرجات أو أدوار تقدري تقللي أوتزيدي على حسب إحتياجك بس لازم تنتبهي للقياسات

عرض الاستاند حقي 60 سم وبرضو تقدري تخليه اصغر أو أكبر حسب حاجتك
حأحط قياسات لإستاند أصغر نهايه التدوينه بإذن الله 

دحين نجي للطريقه 

(1)

جيبي الفلين العادي وبإستخدام المرسمه والمسطره ححدي قد ايش تبغي الطول والعرض 

الاستاند حقي طولو 30 سم وعرضو 60 سم 

زي مانتو شايفين في الصوره 

(2)

بعد ماتحددو بالمرسمه قد ايش الطول والعرض بإستخدام المشرط قصو الفلين زي الصوره 

(3)

وتستمرو زي كدا  نفس العرض بس الطول طبعا يتغير 

يعني الفلينه التانيه حيكون عرضها نفسو 60 سم بس الطول حيكون مختلف كل فلينه جديده حتقصوها حتنقصو 5 سم تقريبا من الطول عشان دي الـ 5 سم هيا الا حتحطو فيها المناكير  

يعني الفلينه الأولى الا قصيناها طولها 30 سم صح 

الفلينه التانيه حتكون 25 سم 

والتالته 20 سم 

والرابعه 15 سم وهكذا .....

 فيصير عندك 6 فلينات بنفس العرض بس بأطوال مختلفه 

شوفو الصور وان شاء الله تفهمو قصدي 

بعد ماتخلصي من قص كل الفلينات دحين عندك خيارين:-

1- يا انك تلصقي القطع بغرا المسدس فوق بعض بالترتيب فتصير عندك زي المدرجات وتلونيها بألوان الاكريلك وتخليها تنشف وبس 

2- أما الخيار التاني هوا الا سويتو لانو صراحه ماحب ملمس الفلين العادي 

تجيبي تجليد او ورق تغلف او اي نوع ورق تحبيه وتغلفي القطع الا قصيتيها غالبا نوع الفلين دا مررا صعب اي شي يلصق فيلو فحتى لو جبتي تجليد يلصق غالبا محا يلصق فحتحتاجي غرا المسدس عشان تلصقي التجليد 

المهم تغلفي كل قطع الفلين الا سويتيها انا استخدمت لونين بالتناوب وردي ورمادي نفس لون غرفتي 

بعد ماتغلفي كل القطع تلصقيها فوق بعض بغرا المسدس وكدا الاستاند جاهز

 بس في حركه إضافيه احب أسويها وهيا 

أجيب فلين مضغوط وأقصو زي الصوره 

القطعه المستطيله تلصقيها  من ورا الاستاند والقطعتين التانيه من الاطراف بحيث الجزء المايل 34 سم  يكون من فوق
والجزء المستقيم 31 سم من تحت طبعا برضو غلفتها بنفس التجليد الا استخدمتو للفلين العادي 

ملاحظه :-
جدا أسفه ماصورت كل الخطوات لانو بعد ماقصيت لمن جيت أغلف الفلين اتحمست ونسييت أصور ومااتزكرت الا بعد ما خلصت
و ترا الخطوات والطريقه جدا سهله بس انا شرحت بتوسع عشان كدا البوست طويل

خطوه إضافيه للتزيين

بعد مالصقت كل القطع وركبت الاستاند جبت من اللصق الملون والمزخرف الا من جرير ولصقتو في الأطراف حقت الاستاند من جوا عشان يعطي شكل حلوعشان التجليد الا استخدمتو كل ساده فحبيت اضيف شي مزخرف

ودا الشكل النهائي بدون المناكيرات

وهنا بعد مارصيت المناكير 
 ❤️❤️

.
.
.

إن شااء الله يارب تكون الطريقه واضحه وشرحي واضح

أسفه على الإطاله وأشوفكم في تدوينه جديده ان شااء الله
مع السلامه

قياسات لعمل إستاند أصغر يتكون من 5 مدرجات او أدوار

العرض 35 سم الطول 25 سم للقاعده
ونفس الطريقه ننقص من الطول 5 سم ونقص 5 فلينات
تصير القياسات
الدور الاول العرض 35 سم والطول 25 سم
الدور التاني العرض 35 سم والطول 20 سم
الدور التالت العرض 35 سم والطول 15 سم .... وهكذا
تصير عندنا 5 فلينات وتسوو نفس الخطوات الا فوق