فوتوشيني بطريقة التوتاويه

السلام عليكم ورحمة الله وبركاته كيفكم ان شاء الله بخير 

تدوينه اليوم " فوتوشيني بطريقة التوتاويه "

...

المقادير:- ( تكفي تقريبا 5 - 6 أشخاص )

1- صحن صدور دجاج مقطعه شرائح أو مكعبات 
2- مكرونة الفوتوشيني أو اي نوع تاني هنا استخدمت فكرونة أقلام 
3- علبه ونص كريمه طبخ ممكن تزيدو وتنقصو على حسب ماتحبو 
4- ملعقه طعام جبنة كاسات
5- ملح وفلفل اسود
6- مكعب ماجي
7- بهارات ايطاليه
8- بودره ثوم وبصل 
9- نعناع ناشف 
10- كزبره مطحونه 
11- ملعقتين كبار عصير ليمون
12- زيت زيتون 

الطريقه :- ( الوقت تقريبا نص ساعه او 45 دقيقه )

نحط شويه زيت زيتون في القدر أو الطاوه و بعد ما يحمى الزيت نضيف الدجاج مع بودره البصل والثوم ومكعب الماجي 

لمن يبدأ الدجاج يستوي ويتغير لونو نضيف كل الأبازير أو البهارات( ملح وفلفل اسود - بهارات ايطاليه - كزبره ناشفه - نعناع ناشف )

ونقلب مزبوط ونغطيه شويه الين ما تنشف مويه الدجاج 

وكدا يكون شكلو بعد ما نكشف الغطا , الدجاج تقريبا استوى خلاص واغلب المويه نشفت 

بعد ما يستوي الدجاج نضيف ملعقه الجبنه كاسات ونقلب مزبوط  وهنا ممكن تدوقو الدجاج عشان تتأكدو انو الملح كويس والأبازير مناسبه 

لمن خلاص تتأكدو انو الدجاج مستوي والأبازير كويسه نضيف كريمه الطبخ والليمون  ونقلب مزبوط ونخليها الين ماتبدأ تغلي

لمن تغلي الكريمه نضيف المكرونه الا نكون سالقينها من أول ونقلب شويه الين ما تختلط المكرونه مع الكريمه مزبوط  هنا ممكن نزيد كمان شويه أبازير ايطاليه عشان تعطي طعم للكريمه :)
ملاحظه: طريقه سلق المكرونه والوقت غالبا يكون مكتوب على الكيس او العلبه من ورا 

وهنا الشكل النهااائي ...

وهنا صوره تقريبية 

وبالهنا والعافيه عليكم ولا تنسوو تشاركوني تطبيقاتكم على الانستقرام  Tutawiyeh@ مررا حأنبسط منها 

أشوفكم في بوست جديد 
مع السلامه 

...