ريفيو لباليتات الطباعه من سي سي أند سيسي ( CICI & SISI )

السلام عليكم ورحمه الله وبركاته
كيفكم ان شاء الله تمام 

بوست اليوم حأتكلم عن باليتات الطباعه من ( CICI & SISI ) 
وان شاء الله تستفيدو من دا البوست 

طيب اول شي ( Cici & Sisi ) مسوين 4 شنط بأربعه ألوان مختلفه
( أبيض , فوشي , أصفر , برتقالي ) كل شنطه فيها 6 باليتات طباعه بتصاميم مختلفه + ستامبر وسكرايبر                                   ( طابعه وكاشط )

يعني نقشات الشنطه البيضا مختلفه تماما عن نقشات الشنطه الصفرا وزي كدا
وتجي كل شنطه في علبه بيضا ومقفله كويس وعليها شعار الشركه  

في فرق وحيد بين الشنط انو الشنطه الصفرا والبرتقاليه الباليتات الا فيها فيها 15 نقشه صغيره والمساحه الا فوق فيها رسمه كبييره اما الشنطه البيضا والفوشيه فيها 24 نقشه صغيره وفي النص في رسمات صغاار مررره حتفهمو قصدي لمن تشوفو الباليتات بعد شويه 

صراحه اشوفها جداا ممتازه للي تحب الطباعه وتبغا حاجه منوعه وحجمها كويس جداا انصحها بيها والحلو كمان انو تجي معاها الستامبر والسكرايبر ( طابعه وكاشط ) بدال ماتشتريها بشكل منفصل ومررا كويسه بس عن نفسي صراحه ما حبيت الكاشط لانو حديد وممكن يخدش الباليت فممكن تستخدمي بدالو بطاقه صراف او اي بطاقه قديمه عندك اما الطابعه او الستامبر مررا كويسه 

طلبتها من موقع أمازون سعر الشنطه الوحده تقريبا 30 دولار يعني 116 ريال

رابط الشنطه الصفرا
رابط الشنطه الفوشيه

كدا شكلها من برا 

وكدا شكلها من جوا ,,, كل باليت محفوظ في مغلف شفاف 

الشنطه من برا قماشها جلد بس من جوا قماشها زي المخمل ناعم 

طبعا كل باليت من الباليتات السته يجي عليه غلاف لونو ازرق شفاف
عشان يحفط الباليت وطبعا قبل الا ستخدام تشيليه 

ودا شكل الستامبر والسكرايبر ( الطابعه والكاشط )
وزي منتو شايفين الكاشط طرفو حديد فما استخدمو عشان لا يخدش الباليتات 

وهنا قياسات الباليت طول الباليت تقريبا 15 سم وعرضو 10 سم 
وقياسات النقشات الا فيلو الطول 2 سم والعرض 1.5 سم 

.

.

. 

دحين حأوريكم كل شنطه وايش الباليتات الا فيها أول شي نبدأ بالشنطه الفوشيه

 دا أول باليت ورقمو 07 طبعا فيلو 24 نقشه ونقشات  صغيره في النص 

دا الباليت التاني ورقمو 08 ونفس الشي فيلو 24 نقشه ونقشات صغيره في النص 

 

وهنا الباليت التالت ورقمو 09 

وهادا الباليت الرابع ورقمو 10 

وهنا الباليت الخامس ورقمو 11 

وهادا أخر باليت في الشنطه الفوشيه ورقمو 12 

...

دحين نجي للشنطه الصفرا 

دا أول باليت في الشنطه الصفرا ورقمو 13 زي منتو شايفين تحت 15 نقشه وفوق نقشه كبييره بعرض الباليت ودا هوا الفرق بينها وبين الشنطه الفوشيه

ودا تاني باليت ورقمو 14 

 ودا التالت ورقمو 15

ودا الرابع ورقمو 16 

ودا الباليت الخامس ورقمو 17 

ودا أخر باليت ورقمو 18 

زي منتو ملاحظين الشنط مرتبه يعني الشنطه البيضا تبدأ الباليتات فيها من رقم 1-6 والفوشيه من 6-12 والصفرا من 13-18 والبرتقاليه من 19 - 24 

.

.

.
وبكدا وصلنا لنهايه البوست يارب تكونو استفدتو منو 

أشوفكم في البوست الجاي مع السلامه 

..