مقارنه بين باليتات الطباعه من مويو لندن ( Moyou London ) وسي سي أند سيسي ( Cici & Sisi )

بسم الله الرحمن الرحيم
السلام عليكم ورحمة الله وبركاته
كيفكم ,, وكيف رمضان معاكم ؟

بوست اليوم طلب من متابعه جمييله طلبت مني أسوي مقارنه بين باليتات الطباعه 

من مويو لندن وسي سي اند سيسي 

ازا تبغو تعرفو ريفيو مفصل عن الباليتات شوفو الروابط لانو اتكلمت عنها 

 
رفيو باليتات الطباعه من سي سي أند سيسي
رفيو باليتات الطباعه من مويو لندن 

طيب نبدأ دحين في المقارنه  
حتكون المقارنه من حيث:
1- الشكل
2- الجوده 
3- الحجم 
4- تنوع النقشات 
5-السعر
6- سهوله الطلب 

ملاحظه : حأقارن بشكل عادي وفي النهايه مرره حأقول رأيي

.

.

.

.

طيب أول شي نبدأ المقارنه في الشكل :

 سي سي أند سيسي عباره عن شنطه  وفيها جيوب شفافه وجواتها الباليتات محفوظه 

أما مويو لندن كل باليت يجي في غلاف ورقي متين عليه رسومات مميزه تميز كل مجموعه عن التانيه
( الا شاف الريفيو حيفهم قصدي ) 

نجي دحين للنقطه التانيه من المقارنه وهيا الجوده :
في الجوده حأقارن جوده التغليف وجوده الباليت والنقشات
 

.

سي سي أند سيسي زي ماقلتلكم شنطه مصنوعه من برا من الجلد ومن جوا من قماش متين 
والباليتات محفوظه في جيوب شفافه من البلاستيك يعني من ناحيه التغليف ممتازه وعمليه 
نجي للباليتات والنقشات 
الباليتات الحلو فيها انو تحت الباليت الحديد في بلاستيك ( الا لونو وردي ) عشان يحمي اليد لانو لو كان حديد بس كان ممكن يجرح اليد اما وجود البلاستيك شي مرا جميل (شوفو الصوره وحتفهمو قصدي)
النقشات محفوره بدقه وواضحه جدا حتا التفاصيل الصغيره وأدق التفاصيل واضحه في الطباعه ماشاء الله

.

.

مويو لندن الجوده من ناحيه التغليف ورق متين وعليه رسمات تميز المجموعه 
الباليتات  نفس سي سي أند سيسي تحت الباليت الحديد في بلاستيك ودا شي مرررا كويس واصلا يعطي الباليت شكل فخم أكتر من لو كان بس حديد حيطلع شكلو شيبي (رخيص)
النقشات برضو زي سي سي اند سيسي محفوره مزبوط وواضحه حتا التفاصيل الصغيره واضحه في الطباعه ماشاء الله

. 

تالت نقطه في المقارنه الحجم :

.

من ناحيه الحجم سيسي أند سيسي أكبر لانو النقشات الا في الباليت أكتر 24 نقشه  
أما مويو لندن أصغر كل باليت فيلو 12 نقشه هادا بالنسبه للنقشات الا حجمها كبير أما النقشات الا حجمها صغير ففيها 18 نقشه 
وكلها أحس حجمها مناسب ازا تبغي تاخديها في السفر او اي مكان 

.
رابع نقطه في المقارنه تنوع النقشات :

.

زي ماتعرفو سي سي أند سيسي عندها 4 شنط وكل شنطه مختلفه في النقشات 
و الشنطه الوحده فيها 6 باليتات نقشاتها محدده وبرضو منوعه يعني ماتقتصر على شي واحد جامعه بين عده نقشات يعني مثلا أشكال هندسيه وورود ووجوه وزي كدا بس العيب انو ماتقدري تختاري النقشات الا في الشنطه يعني مثلا عجبتك نقشه من الشنطه الأولى وعجبتك نقشه من الشنطه التانيه ماينفع تختاري هيا تجي كدا شنطه حدده فيها نقشات محدده ليها.
نجي دحين لمويو لندن الا قري الريفيو حق مويو لندن أو دخل الموقع حقهم عارف انو مويو لندن جداااا منوعه
يعني عندهم أكتر من 35 كاتيقوري أو مجموعه كل مجموعه عن شي معين يعني مثلا مجموعه عن البحر مجموعه عن السفر مجموعه عن الابراج مجموعه عن الطبخ وكتيير غيرها وطبعا كل مجموعه فيها اكتر من 8 او 12 باليتات تختاري منها 
 يعني عندك تنوع كبييييير في الخيارات بعكس سي سي أند سيسي.

.

نجي للنقطه الخامسه في المقارنه وهيا امكن أكتر شي تهم الواحد السعر :

.

سي سي أند سيسي سعر الشنطه وفيها 6 باليتات مع طابعه وكاشط
29.99 يعني تقريبا 30 دولار وتقريبا بالريال 116 ريال.

 
أما مويو لندن سعر الباليت الواحد 4.99 يعني تقريبا 5 جنيه استرليني لانو الموقع بريطاني
 يعني تقريبا بالريال 25 ريال من غير طابعه أو كاشط لأنها تنباع بشكل منفصل.

 
يعني من ناحيه السعر سي سي أند سيسي أرخص لأنو 6 باليتات مع طابعه وكاشط بـ 116 ريال
أما مويو لندن لو مثلا أخدتي 6 باليتات مع طابعه وكاشط من موقعهم تطلع تقريبا بـ 175 ريال.

.

 
أخر نقطه مقارنه هيا سهوله الطلب :

.

سي سي أند سيسي تطلبيها من أمازون فلازم يكون عندك بريد أمريكي عشان تنشحن عليه وسعرها مع الشحن وكلو تقريبا ماتعدي 200 ريال وتوصل تقريبا في حدود اسبوعين لتلاته على حسب.

مويو لندن تطلبيها من موقعهم الرسمي وعندهم شحن دايركت على السعوديهعن طريق سمسا (فيديكس سابقا ) وتوصل في أقل من اسبوعينوسعر الشحن تقريبا 50 ريال

صراحه أشوف كلها سهله في الطلب خاصه انو في كتير تاجرات ممكن تعطيهم الرابط ويطلبولك هيا ازا إنتي ماتقدري بس اهم شي أتأكدي انو التاجره كويسه وماتغليلك السعر 

.

وهنا حأقول رأيي الشخصي أيش أفضل بيناتهم

.

 
أول شي صراحه عن نفسي أنا أحبهم الاتنين وكلهم كويسين بالنسبالي 
بس أفضل مويو لندن عن سيسي أند سيسي لدي الاسباب :
1- شكل مويو لندن والتغليف حقها جدااا يجذب ومرا تعجبني رسماتهم المنوعه الا على كل باليت 
يعني لدرجه في أغلفه تعجبني أكتر من النقشات الا جوه الباليت هههههههه
2- تنوع النقشات مويو لندن نقشاتها جدااااا منوعه واقدر اختار الا أبغاه واي مجموعه احب وغير كدا ماشاء الله كل يوم جمعه ينزلو حاجه جديده يا مجموعه جديده يا ألوان مناكير جديده 
3- أخر شي ماشاء الله سريعه في الوصول أقل من اسبوعين تكون عندك بس هوا العتب شويه على السعر بس مدام الجوده والشكل حلو السعر نغض البصر عنو شويه ^_^

.

ملاحظه: ممكن يكون في باليتات أحسن في السعر أو الأشكال غير الا اتكلمت عنها بس دي النوعين الا عندي (: 

وبكدا وصلنا لنهايه البوست يارب تكونو استفدتو منو
أشوفكم في بوست جديد
مع السلامه 

.

.

.