أساسيات فن الطباعه (الأدوات + الطريقه الصحيحه للطباعه+ نصائح )

بسم الله الرحمن الرحيم 

السلام عليكم ورحمه الله وبركاته 

كيفكم ان شاء الله تمام 

موضوع اليوم كتيييييير جاتني أسئله عنو والمفروص أنزلو في رمضان بس

انشغلت شويتين واليوم اخيرررا كتبتو 

البوست دا حيكون على قسمين  

القسم الأول حأتكلم عن الادوات والطريقه الصحيحه للطباعه + نصائح

والقسم التاني حيكون بإذن الله عن مناكيرات موجوده عندنا في السوق تنفع للطباعه غير مناكيرات الطباعه 

وبسم الله نبدأ القسم الأول 

أول شي الأدوات الا تحتاجيها في الطباعه :-

1- باليتات طباعه 

2- ستامبر ( طابعه )

3- سكرايبر ( كاشط )

4- مناكير 

5- مزيل مناكير 

6- قطن 

7- لصق 

8- فرشه 

1- باليتات الطباعه 

لها اشكال واحجام وماركات كتيييييير اختاري الا يناسبك ويعجبك بس اهم شي تتأكدي انو الماركه كويسه لانو احتمال بعضها ماتكون النقشات محفوره تمام فما تنطبع تمام.

في الصوره تلاته ماركات الماركه الأولى هيا سي سي اند سيسي اتكلمت عنها في بوستات سابقه

 الماركه التانيه مويو لندن شركه بريطانيه اتكلمت عنها في بوستات سابقه  

والتالته من شركه كوناد لهم موقع تقدري تطلبي منو او ازا كنتي من الرياض موجود محلهم في الرياض جاليري 

2- الستامبر أو الطابعه

 

لها اشكال وألوان وأنواع كتير زي منتو شايفين في الصوره 

في نوع كبير وفي نوع صغير وفي على شكل مستطيل 

ونفس راس الطابعه لو انواع كتيييير بعضها يكون قاسي شويه وبعضها لين وبعضها يكون زي المارشميلو بس صراحه مني عارفه كيف اشرحلكم هوا كتابه

 فشوفو الفديوهات دي عشان تعرفو قصدي   

أنواع الستامبرز

أنواع الستامبر 2  

في الفديوهات مو كل النواع موجوده بس تقريبا الأغلب 

ملاحظه ( بعد ماشفتو الفديو التاني في احد زيي اتجنن على كميه المناكيرات والاشياء الا عندها :"(   )

3- السكرايبر أو الكاشط 

في نوعين للسكرايبر اول نوع البلاستيك والتاني الحديد
الحديد احسن بس مع الاستخدام الكتير الباليت ممكن ينخدش والنقشات ماتصير كويسه وتحتاجي تشتري باليت جديد
اما البلاستيك جداا كويس وابدا مايعدم الباليت ويحافظ عليه وصراحه هوا الا أفضلو عن الحديد
كمان ممكن تستعملي بدال السكرايبر اي  بطاقه قديمه عندك زي بطاقات الصراف او اي بطاقه بلاستيك

4- المناكير

 ( حأتكلم عنو في بوست تاني عشان اخد راحتي ومااطول عليكم )

5- مزيل المناكير + 6- قطن

الأفضل طبعا مزيل مناكير خالي من الاسيتون وتلاقوه موجود في اغلب الصيدليات 

لمن تمسحي المناكير الباقي على باليت الطباعه الافضل تستعملي القطن الا في الصوره عشان يكون ناعم ومايخدش الباليت 

7- لصق ( إختياري )

اللصق فايدتو انك بعد ما تطبعي النقشه على الستامبر وتطبعيها على ضفرك ممكن يبقى شويه من النقشه على الستامبر 

ممكن تشيليها بمزيل مناكير بس الأفضل تجيبي اللصق وتحطيه على المناكير الباقي وعلى طول ينشال 

لأنو المزيل ممكن بعد استخدام طويل يعدم الستامبر او الطابعه 

8- فرشه 

الغرض من الفرشه انك تنضفي حول الاضافير بعد الطباعه
تغطسي الفرشه في المزيل وتمسحي حولين الاضافر عشان تكون النتيجه النهائيه مرتبه 

دحين نجي للطريقه الصحيحه للطباعه + نصائح 

1- أتأكدي انو كل الاشياء الا تحتاجيها جنبك عشان ماتقومي كل شويه تجيبي شي

2- جيبي قطنه وحطي فيها مزيل مناكير وامسحي فيها الباليت قبل ماتستخدميه عشان تتأكدي انو نضيف ومافيلو غبار وعشان يمسك اللون في النقشه أحسن وازا الباليت لساعو جديد لا تنسي تشيلي الغلاف الشفاف الازرق 

3- حطي اللون على النقشه الا تبغيها لا تحطي مرا كتير ولا مرا قليل بس حطي كميه مناسبه

4- جيبي السكرايبر واكشطي اللون مره او مرتين لا تكتري الكشط وخلي حركتك خفيفه وسريعه 

5-  بسررعه امسكي الستامبر او الطابعه وبحركه برضو خفيفه اطبعي النقشه 

6-  مررا مهم قبل ما تطبعي النقشه على ضفرك طالعي فيها هل النقشه مزبوطه, انشالت تمام ازا أتأكدتي من دي الاشياء اطبعيها على ضفرك بس طبعا دي الحركه تكون سريعه عشان لا ينشف اللون على الستامبر وماتنطبع النقشه تمام على ضفرك 

7- واخر شي بعد ماتنطبع النقشه على ضفرك وخلاص جيبي فرشه وغطسي فيها المزيل عشان تنضفي حول الضفر عشان تكون الاضافير مرتبه 

وهنا فديو فيلو شرح عملي للكلام الا كتبتو 

ملاحظه ( الفديو جدا طويل فشوفو بس اول 7 دقاق هيا المهمه )

فديو طريقه الطباعه

..........................................................................

اخر شي في البوست حأعطيكم نصائح أشوفها برضو مهمه عشان تطلعي بنتيجه كويسه ومرضيه 

نصيحه (1)

 كتيير يطبقو كل  الخطوات الا فوق وفي النهايه ماتنشال النقشه معاهم كويس ودي هيا الاسباب :-

أ- ممكن خليتي المناكير وقت طويل ونشف فحاولي قد ماتقدري بسرعه ولا تستخدمي المناكير الا ينشف بسرعه إلا لو اتعودتي على الحركه السريعه لانو المناكيرات الا تنشف بسرعه  غير عن المناكيرات العاديه يبغالها شويه سرعه اكتر. 

ب- ممكن طريقه الكشط تكون السبب يعني بعض النقشات يبالك تكشطيها من الجنب او على تحت او على فوق انتي جربي كل الطرق وشوفي ايش الطريقه الا تناسبك وتناسب باليت الطباعه. 

ج- أخر سبب ممكن يكون من الستامبر او الطابعه 

بعض الستامبر لازملها برايم او برد لانو بعضها يكون سطحها يكون جداا ناعم وأملس او فيلو لمعه خفيفه فلازم تروح دي اللمعه او النعومه الزايده فإيش نسوي جيبي مبرد الفلين مو الحديد وبشويش ابردي سطح الستامبر واسحي بمزيل أو كحول وجربي اطبعي ازا برضو ماشالت النقشه كويس ارجعي ابردي خفييف مو بقوه وامسحي بمزيل او كحول وجربي تاني الين ماتزبط معاكي 

وهنا فديو فيلو طريقه البرايم او برد الستامبر 

طريقه برد الستامبر

النصيحه (2)

قبل ماتطبعي اتأكدي انو المناكير الا على ضفورك ناشف تماما لانو لمن تطبعي فوقو وهوا مو ناشف النقشه محا تطلع مزبوطه وكمان المناكير الاساسي الا حطيتيه ينخرب وحتطري تمسحيه وترجعي تحطي تاني 

النصيحه (3)

اتفرجي فديوهات في اليوتيوب عن الطباعه وشوفي كم طريقه انا زي كدا اتعلمت وحتلاقي طرق مختلفه واشياء حلوه بس اكتبي Stamping nail art  

وكمان شي مررا مهم جربي كم مرا وحاولي مو اول او تاني مره ما زبط خلاص قلتي خربان او مااعرف لا جربي وجربي وجربي 

.

.

.

.

وبكدا وصلت لنهايه الجزء الاول من اساسيات فن الطباعه 

اشوفكم في البوست الجاي الا حيكون عن مناكيرات الطباعه فكونو قريب 

مع السلامه